Kaptein Renier nou aan die stuur by Laerskool Florida

on .

Daar is ‘n nuwe kaptein aan die stuur by Laerskool Florida en hy is slaggereed vir die nuwe verantwoordelikhede en uitdagings.

Die 36-jarige Renier van Eyssen het vertel dat hy baie verlig was toe hy die oproep ontvang het om hom in te lig dat hy nou amptelik die nuwe skoolhoof is. “Ek het reeds verlede kwartaal as hoof waargeneem, en toe ek die oproep van die Departement van Onderwys ontvang, was my eerste gevoel dié van dankbaarheid. Ek voel ook baie geëerd dat die gemeenskap, onderwysers, beheerliggaam en leerders genoeg vertroue in my het om my aan die stuur van hierdie boot (die skool) te plaas,” het hy gesê.

Renier is reeds 16 jaar in die onderwys en, alhoewel hy dit nou vir niks sal verruil nie, was dit nie sy eerste beroepskeuse nie. “Ek het aanvanklik BCom (Sportbestuur) by die destydse RAU studeer, en het eers nadat ek my eerste pos as afrigter by ‘n Engels-medium privaatskool gekry het, besef dat ek dalk eerder ‘n onderwyser sou wou wees. Ek het my nagraadse studie by Unisa voltooi en by Laerskool Florida begin skoolhou. Daarna het ek ‘n bevorderingspos gekry en by Laerskool Dr Havinga gaan skoolhou. In daardie tyd het ek my Honneursgraad voltooi. Daarna is ek as adjunkhoof weer by Laerskool Florida aangestel,” het Renier vertel.

Hy het bygevoeg dat hy vanjaar met sy Meestersgraad begin het, waarvoor hy op personeelontwikkeling gaan fokus. “Die verdere studie gaan nie net oor die kwalifikasie of die kennis nie, maar dit is vir my ‘n passie. Ek hou van leer. Al is dit nie altyd lekker nie, maak die eindresultaat dit altyd die moeite werd,” het hy laggend gesê.

Renier het bevestig dat hy nie nou skielik alles gaan probeer verander nie. “Die grootste verandering wat ek wél aangebring het, was om vir ons ‘n jaartema te kies, en ook om die vyf Florrie-waardes in te bring. Hierdie waardes is nie noodwendig skoolreëls nie, maar kan daaraan gekoppel word. Die leerders kan ook hierdie waardes na skool toepas, wanneer hulle by die huis is,” het hy verduidelik.

Renier het met die volgende boodskap afgesluit, “Ek wil begin deur elkeen te bedank vir hierdie wonderlike geleentheid. My gebed is dat ons almal saam die reis vanjaar sal onderneem, en dat alles wat ons dink, doen en besluit, tot voordeel van ons kinders sal wees.”

Florries se hoof groet na 25 jaar

on .

Pragtige berig in die Roodepoort rekord geplaas:

Baie dankie Adéle Blom.

 

Na 25 jaar groet Laerskool Florida hul skoolhoof, Francois du Toit, wat aan die einde van die jaar aftree.

Francois, 65, se onderwysloopbaan het op 1 Januarie 1975 by Hoërskool Windhoek in Namibië begin, en nou, 42 jaar en vele ondervindings later, lê hy die tuig neer.

Hy was van 1980 tot 1985 die Departementshoof van Afrikaans by Hoërskool Vorentoe, van 1986 tot 1992 die hoof by JCE se sentrum vir begaafde leerders en is in Januarie 1993 as die hoof van Laerskool Florida aangestel.

Gedurende hierdie tydperk was hy ook die Voorsitter van Sentraal-Wes Atletiek en Rugby, het op Unisa se raad gedien, was ‘n lid van die Roodepoortse Stadsraad en die Voorsitter van die Afrikaanse Kunsvereniging (Rak).

Vir Francois is een van die hartseerste dinge dat kinders nie meer kinders kan wees nie. “’n Goeie voorbeeld hiervan is die pragtige groot fietsloods wat ons 25 jaar gelede hier gehad het, want die meerderheid van die leerders het met fietse skool toe gery. Nou het ons glad nie meer ‘n fietsloods nie, want kinders ry nie meer fiets nie. Dit is vir my hartseer dat ons kinders nie meer die geleentheid het om kinders te wees nie, omdat volwassenes die wêreld verander het,” het hy gesê.

Hy het gesê dat hy vele hoogtepunte op sport-, kultuur- asook akademiese gebied as die hoof van Laerskool Florida beleef het. “Maar die omgee en betrokkenheid van elk personeellid is definitief iets wat ek altyd sal onthou. Elke leerder is as individu erken, en die geleentheid gegun om aan soveel aktiwiteite as moontlik deel te neem om deure vir hulle oop te maak. En, net soos 25 jaar gelede, het elke personeellid toegewy gebly aan akademie,” het hy met ‘n glimlag gesê.

Hy het vertel dat hy die leerders, personeel en ouergemeenskap die meeste gaan mis, maar dat hy daarna uitsien om hierdie Desember rustig te spandeer, sonder om bekommerd te wees oor die volgende skooljaar se beplanning wat gedoen moet word. “Ek is ‘n oupa van vier pragtige kleinkinders, en ek gaan definitief meer tyd saam met hulle kan spandeer. Maar, vir eers, sien ek daarna uit om vir minstens ‘n maand net rustig te wees en niks te doen nie,” het hy laggend vertel.

Ons het net ‘n kort, beperkte tyd op aarde wat ons gegun is en ons moet dit in geloof, hoop en liefde leef – geloof om die mooi van elke dag te sien, hoop om in liefde met mekaar te kan saam leef, en liefde om elkeen wat ons pad kruis met liefde te kan hanteer sodat dit beter in ons land kan gaan. Om suksesvol te wees, moet ons nie aanhoudend in die verlede lewe en die foute van gister oor en oor op die tafel plaas nie.”